Градовите од централна Македонија ќе добијат своја регионална депонија. Вардарскиот плански регион подготвува проект кој треба да утврди каде ќе се наоѓа депонијата. Студијата ја изработува австриска компанија.

- Првиот чекор ќе биде изработка на пре - физибилити студија за да ги откриеме проблемите со кои се соочува регионот во справување со цврстиот комунален отпад, изјави Сабине Киц, претставник на австриската фирма „АСА“.

Надлежните во „Вардарскиот регион“, велат дека се уште не знаат каде ќе се наоѓа депонијата. Општините очекуваат физибилити студијата да ја утврди локацијата, но сепак договорот треба да биде заеднички, вели раководителот Александар Бузалков.

- Можните локации не можеме да ги кажеме сега, оти градоначалниците на претходните седници се договорија дека треба да се најде локација која ќе ја посочат професионалци. Се надевам дека физибилити студијата ќе дефинира локаци кои ќе одговараат за регионална депонија, изјави Александар Бузалков, раководител на „Вардарски плански регион“.

За успешна реализација на проектот за изградба на регионална депонија, потребно е да се вклучат и граѓаните, вели претседателот на „Вардарскиот регион“, Горан Петров. Смета дека е потребно луѓето да научат да го селектираат отпадот. Според Петров, изградбата на депонијата, нема да ги уништи комуналните претпријатиа.

- Моето мислење е дека локалните комунални претпријатиа ќе продолжат да го собираат сметот од домаќинствата, но од градските депонии, сметот ќе се носи во регионалната депонија, изјави Горан Петров, претседател на „Вардарски плански регион“.

Изработката на проектот, „Вардарскиот плански регион“ ќе го чини околу 3 милиони евра. Парите ќе се обезбедуваат од „Светската банка“, но во финансирањето ќе учествуваат и општините. До крајот на годинава ќе биде готов проектот, потоа „Вардарскиот плански регион“ ќе треба да најде инвеститор кој ќе ја гради депонијата.