Поради ова, целосно затнати се канализационите мрежи на улиците Мирче Ацев, Киро Ќучук, Благој Ѓорев, Лазо Трпков и Ганчо Хаџи – Панзов. Во моментов комуналното „Дервен“ работи на отстранување на дефектите.

Портпаролката, Тодорка Пенкова Андреевска, вели дека екипите на јавното претпијатие се постојано на терен и ја извлекуваат земјата од шахтите.

- Работни тимови на ЈКП „Дервен“ веднаш излегоа на лице место и извршија поправка на оштетувањата на канализациони линии на ул. Лазо Трпков и ул. Киро Ќучук. Работните активности поради обемноста ќе продолжат и во текот на наредните неколку дена, при што ќе се изврши поправка на канализациона линија на ул. Ганчо Хаџи Панзов и ул. Мирче Ацев. Има и неколку други помали дефекти настанати поради поплавите од невремето, но тие не се најприоритетни во моментов, и штом ќе завршат работните активности на горенаведените линии, работните тимови ќе продожат со отклонување на дефектите и на овие места, изјави Тодорка Пенкова Андреевска, портпарол на ЈКП „Дервен“.

Истовремено претпријатието ги расчистува улиците од наносите со земја и камења. Досега од градскиот асфалт изнесени се 50 трактори земја. За целосно расчистување, „Дервен“ употребил 30 цистерни вода за миење на сообраќајниците.
Силните поројници уништија и дел од градскиот асфалт, а целосно ги откорнаа и бекатон плочките од повеќе тротоари.

- Во текот на вчерашниот ден, 21.06.2010, до 12 часот, 36 работници од РЕ Комунална хигиена, 13 работници од РЕ Паркови и зеленило и работници од РЕ Канализација изнесоа 49 трактори земја, камења и шут од градските улици. Беше ангажиран и ровокопач во текот на целиот ден, рече Пенкова Андреевска.  

Од комуналното „Дервен“ велат дека работниците ќе останат на терен се додека улиците не се вратат во пробитната состојба.